سالفة بيها رباط …
بقلم: سارية العمري
اكو باص سكانيا نوع ريم قديم طالع من البصرة للنجف مقبطة ركاب لحد باب الباص ، وصل الباص للكوفة وبالطريق واحد اشر للسايق يريد ايروح للنجف ، السايق گال خطيه خل اوگفله ظهرية والدنيا حارة كلش والمسافة قريبة ، حتى لو يصعد وكفه بالممر ،
تعرفون اكثر الركاب يخلون غراضهم بالممر مال الريم … واكو عجوز عدها دجاجه وديچ رابطتهن رجل برجل ومخليتهن بالممر ، صاحبنا العبري الي صعد من الكوفة اول ماصعد چفص ابطن الدجاجه ميدري خطيه ، العجوز شالت روحها ودگتها بالگاع وصاحت عما العماك اليوم انعل والديك الله اذا ماتخسر فلوس الدجاجة هسه ، الرجال خطيه استحى وارتبك ومايعرف شيسوي ، واحد من العبرية صاح عليه و گله خطية الدجاجة دترافس وراح تطلع روحها ، اذبحها ليش اتروح حرامات ، صاحبنا ماجذب خبر كام يفتر على العبرية يسالهم منو ينطيه سجينة حتى يذبح بيها الدجاجة .
فأخذ سچينه من واحد من العبرية وذبح الدجاجه ومن ثوله ماعرف شلون يذبح الدجاجة لان كامت ترافس وظلت الدجاجه تطفر بالممر ودمرت الناس دم وكلها گامت اتصيح عليه … واحد من الگاعدين گله هي اثول غير اتگص رجليها حته لتگمز مو تدمرنا من وراك ، الله لايوفقك ، الرجال مچذب خبر دنگ ايگص رجلين الدجاجه وناسي انو الحجية رابطة رجلين الديج والدجاجة رجل برجل سوى ، وگام صاحبنا ومن كثر مامخبوص گص رجل من الدجاجه ورجل من الديچ ، العجوز طفرت شايطه وتنوح وتلطم وتصيح الله واكبر على عملتك الكشرة ومصايبك الي ماراح تخلص اليوم … الله ينتقم منك سويت الخساره خسارتين .
اكو شايب كاعد بالاخير صاح عليه ، وگله منعول الوالدين صعدت ويانه من الكوفة للنجف لعبت بينه لعب چا لوصاعد ويانه من البصره للنجف چان اسويت بينا ، اكيد جان ذبحتنا كلنا ؟
رباط السالفة الجماعة لو حاكمينا من الخمسينات چان هسه العراق … منقرض !!!
نسخة الى الشعب الي راح ينتخب المرشحين الذين اوصلوا العراق واهله الى هذا المصير …
